Onse Lulu reserwe in die SA Fietsryspan

- Denise Ohlson -

Prince Albert se Lulu Jooste (18 ) is ingesluit as reserwe in die SA Fietsryspan wat in Kaapstad en omgewing gaan deelneem aan die Junior Wêreld Padkampioenskappe vanaf 18 - 20 Julie.

Sy is vandeesweek deur die Suid-Kaap Fietsry Assosiasie en die Oudtshoorn Fietsryklub gelukgewens met haar uitstekende prestasie tydens die SA Padkampioenskap in Oos-Londen - waar sy twee 4de plekke behaal het.

Haar verbintenis met die Oudtshoorn Fietsryklub en die Suid-Kaap Fietsry Assosiasie is ook beloon met dié woorde: "Jy is voorwaar ‘n aanwins vir die Assosiasie. Jou toewyding en prestasies is ‘n voorbeeld en inspirasie vir ander fietsryers binne die Suid-Kaap."

Lulu het haar jaar goed begin deur beide die Suid-Kaap asook die WP kampioenskappe vir die padwedren en tydtoets te wen. Verlede week, by die Oesterfees in Knysna, was sy algeheel 6de Senior vrou en 1ste Junior dame.

A dream came true

- De Wet Luttig, Pretoria -

Tydens my onlangse besoek aan Prince Albert, het ek met groot nostalgie teruggedink aan die 160 km wat ek en Nelis Vermeulen op ons bergfietse aangepak het in November 2005.

Ons het halfvyf die oggend vertrek vanaf Klein-Helmuth (ons “damhuisie” agter die dorp se tennisbane) en is trap-trap deur Die Gang (deesdae Prince Albert Valley), oor Kredouwpas, deur Klaarstroom, Meiringspoort , De Rust , Oudemuragie, Schoemanspoort, oor Swartbergpas en terug na Prince Albert.

Ons motiviering? Ons het al verskeie kere vanaf Prince Albert tot bo-op die berg en terug getrap (het selfs eenkeer in Gamkaskloof oornag) maar van die suidekant het ons Swartberg nooit bemeester nie.

Oor die jare het dit ‘n droom geword. Miskien het voorvader Jan Luttig – wat instrumenteel was by die bou van Swartbergpas - iets hiermee te doen gehad!

Op ons tog is ons met vele hoogtepunte beloon: Daar was n klipspringer reg langs die pad en later ‘n reuse bergskilpad wat heen en weer beur teen ‘n lyndraad. Ons kon die natuur waardeer, vars Karoolug inasem en opnuut besef dat God in beheer is .
My dogters, Jana en Margi, het in Meiringspoort hul eerste verskyning in die “ back-up vehicle” gemaak met ‘n oorvloed verversings.

Dit was wonderlike motivering want die Oudemuragie-grondpad was baie meer vermoeiend as wat ons verwag het. Ook Schoemanspoort se lang opdraandes was baie langer as wat ons ooit verwag het. Gelukkig bied die waterstroompie in die Boegoekloof ‘n ideale lafenis. Daar het ek vir die tweede keer in my lewe afgeklouter om kaalbas in die bergwaterpoel af te koel.

Bo-op die berg het ons “back-up” span en ‘n paar belangstellende toeriste ons handeklappend ingewag. Die laaste twintig kilometer bergaf Prince Albert toe was ‘n “breeze”- by Scholtzkloof se afdraai was dit vir ons lekker om drie skilpaaie uit die watersloot te red .

Daardie aand het ons ons uitstappie van nege uur en veertig minute, ‘n trotse gemiddeld van 16,5 kpu, behoorlik afgesluit met skaaptjops, volstruisfillet en Pinotage saam met ou vriende .

Ten slotte: Hoewel ons al langer as veertig jaar nie meer op Prince Albert woon nie, bly hierdie Karoodorp en sy mense “tops”. Elke besoek bly ‘n groot gebeurtenis.

Chris Jooste jnr – nog ‘n fietsrykampioen!

- Denise Ohlson -

Chris Jooste jnr het op die ouderdom van vyf jaar begin fietsry. Op sewe jaar het hy vir die eerste keer deelgeneem aan ‘n liga-wedren in die Suid Kaap en daardie selfde jaar word hy die Suid Kaap Kampioen in sy ouderdomsgroep.

In 2007 was hy ook vir die derde keer die Junior Sportman van die Oudtshoorn-klub – ‘n toekenning wat hy gekry het vir sy prestasies op Nasionale vlak, soos die Suid-Afrikaanse Kampioenskappe en die Interprovinsiale Kampioenskappe.

Tans neem hy deel aan die Pedal Power byeenkomste in die Westelike Provinsie - in die ope afdeling – en hy vaar uitstekend.

Sy fietsryprestasies kom nie vanself nie; hy glo aan die spreukwoord: ”Sonder moeite, geen vreugde.” Hy weet ook: “Hy wat wil blomme plant, moet baie water aandra.”

Argus 2007

- Louise Jooste -

Dit was weer daardie tyd van die jaar wanneer fietsryers van oral in die land na die Kaap storm vir die jaarlise Cape Argus Pick ‘n Pay fiets-toer.

Agt fietsryers van Prince Albert het vanjaar deelgeneem. Vir Oom Dawid Rossouw en Ceril Afrika was dit ‘n eerste. Vir Lulu het dit vier jaar geneem om 2 min vinniger as haar pa te ry, maar pa is baie trots op sy afrigting.

Lulu was 4de Jnr dame uit 97 Jnr’s van regoor die land en algeheel 3de van die Suid-Kaap dames.

Die tye was as volg:
Lulu Jooste 3h13
Chris Jooste 3h15
Johan Fourie 3h34
Louise Jooste 4h25
Ceril Afrika 5h08
Dawid Rossouw 5h13
Johan Rissik 6h00